काठमाडौं - टोखा नगरपालिका वडा नम्बर ६ ले आगामी आर्थिक वर्षका लागि योजना तय गर्न सुझाव संकलन गरिरहेको छ ।
यसैक्रममा शनिबार वडा कार्यालयमा नीतिगत सुझाव तथा कार्यक्रम संकलन गर्ने उद्देश्यले वडाबासीहरु वीच परामर्श गरिएको छ । कार्यक्रममा वडा अध्यक्ष शान्ता पौडेलले सडक, ढल, पानी जस्ता भौतिक पूर्वाधारका कार्य अधिकांश सकिएको भन्दै दीर्घकालीन विकासका कार्य र वडाबासीलाई प्रत्यक्ष सेवा दिने काममा अबको प्राथमिकता रहेको बताउनु भयो ।
उहाँले वडा कार्यालय नजिकै साना नानीहरुका लागि ४ कोठे इसीडी भवन निर्माण सकिन लागेको, लाखेडांडामा चिल्ड्रेन पार्क बनेको र वडा नजिकै पुस्तकालय सहितको जेष्ठ नागरिक भवन तथा डेढ करोडको लगानीमा युएन पार्क बन्न लागेको बताउनु भयो । वडा अध्यक्ष पौडेलले बालमैत्री वडा घोषणाको तयारी धमाधम चलिरहेको पनि जानकारी दिनु भयो ।
परामर्श कार्यक्रममा वडाका विभिन्न पेशा, व्यवसायका झण्डै ५० बढि अगुवाहरुको सहभागिता थियो । सहभागिहरुले वडामा भैरहेका विकास योजनाको गुणस्तर सुधारमा ध्यान दिनु पर्ने, वडामा योग अभ्यासको व्यवस्था गर्नु पर्ने, वडाबासीको क्षमता र पहुँच उपयोग गर्न तथ्यांक राख्नु पर्ने, विजुलीको नांगो तार रहित वडा बनाउन पहल गर्नु पर्ने लगायतका सुझाव दिएका थिए ।
.jpg)
प्रकाशित:
Sunday, May 25, 2025 | 14:03:00 आइतबार, १२ जेठ, २०८२
2025-06-30-03-54-53.gif)
